Biar babe aye Jawa Tulen dan Ibu Sunda aseli, aye lahir di tanah Betawi dan cinte mati ame Budaye Betawi dan tentu aje almarhum Benyamin Sueb. Ceritanye aye lagi rindu ame beliau nih dan nostalgie dikit inget-inget waktu aye masih jadi bocah ingusan nyang kalo maen kagak pernah make alas kaki alias nyeker.
Iye, Bang Ben sedikit banyak udeh mempengaruhi aye dalam mencintai budaye Betawi. Buat sohib-sohib nyang belom kenal betul ame Bang Ben boleh diliat biografi singkatnye di Tempo.
Asyik ye? Jamannye bang Ben mude, kagak ade istileh apel itu kudu nonton bioskop, jalan-jalan di mal, makan di kafe, maen di Dufan, apelagi nyampe nge-blog kasmaran. Pokoknye irit kagak usah ngeluarin doku atawa fulus buat naek andong, ngisi bensin, naek helicak, ame bayar pulse. Liatin deh Bang Ben ame Mpok Ide. Cukup bawa buah-buahan terus gelar tiker. Maklum kebun masing luas. Kalo haus tinggal nyari tukang bajigur. Aduh sedapnye... Resikonye paling kena ujan aje. Biar udeh nyiapin payung kaki bakal belepotan kena tanah yang debel. Ame kudu ati-ati ame Hansip nyang ngeronde. Tuh orang doyan ngintip, gangguin, ame kekian. Pade kagak bise seneng liat orang bahagie. Bawaannye sirik. *Ups kagak nyambung same topik, sok tau lagi*
Selain piyawai maen pelem, beliau juga gape nyanyi. Menurut aye lagu-lagunye Bang Ben sederhana, lucu, seger, dan mencerminkan budaye Betawi saat itu. Aye juga demen kalo beliau duet ame mpok Ide. Biar kate Bang Ben ame Mpok Ide bukan suami istri, buat aye mereka jodoh. Kalo mereka udeh nyanyi klop betul dah. Salah satu judulnye nyang aye terus kesengsem sampe sekarang adaleh Begini Begitu. Lirik lagunya hanya ade dua kate. Begini ame begitu. Mpok Ide ngotot bilang "begini" sedangkan Bang Ben ngotot bilang "begitu". Duh lucunye.
Ade lagi nih, lagu nyang nyeritain hari resepsi nikahan suami isteri. Judulnye Penganten. Aye kutipin aje ye liriknye.
"Bang Mamat nape duduk bengong aje? Malu dong tetamu pade ngeliatin aje."
"Duh, Mineh. Ati Abang deg-degan. Rasenye badan abang pada dingin."
"Bang mamat e kenape tampangnye jadi pucet?"
"Nggak kenape-nape Abang ngga bisa bilang."
"Entar dikate ape penganten sedih aje."
"Sedih bukannye sedih rase dibakar api."
"Siapa tuh yang ngeliatin aye. Tetamu kenape merongos aje (aih)?"
"Duh, Mineh. Abang minta ampun aje. Yang dateng sebenarnye bini gue..."
Begimane, udah mulai jatoh cinte belom? Oh iye, sebelum ditutup, ini aye tampilin lagi Bang Ben lagi maenan Aer. Tampang desa rejeki kota.
Inget sodare-sodare, Bahase Betawi aye masih caur. Harap maklum!